Leiðbeiningar um íslensk vegabréf

Efnisyfirlit

 

Umsókn um íslenskt vegabréf

Afgreiðsla sendiráðsins er opin alla virka daga frá kl.10 til 15 og afgreiðsla vegabréfa er samkv. samkomulagi á afgreiðslutíma sendiráðsins. 

Vinsamlega pantið tíma hjá sendiráðinu fyrirfram í síma 23 23 75 30.

Þegar sótt er um vegabréf þarf að sýna eftirfarandi gögn:

  • Eldra vegabréf
  • Sjá upplýsingar um sérstakar reglur fyrir 18.ára og yngri (sjá neðar)

Umsækjandi þarf að koma í sendiráðið í eigin persónu þar sem lífkennamynd er tekin af viðkomandi á staðnum. Þar með er óþarfi að koma með passamynd. Umsækjendur yfir 10 ára þurfa að vita hæð sína.

Gjald fyrir vegabréf er NOK 970 fyrir 18-66 ára en NOK 440 fyrir aðra. Hægt er greiða á staðnum með norsku debetkorti, ekki er tekið við kreditkortum né íslenskum debetkortum.

Vegabréfin eru útbúin á Íslandi og póstsend á heimilisfang umsækjanda. Frekari upplýsingar er hægt að finna hér. Vegabréfin eru ekki send með ábyrgðapósti.

Hægt er að sækja um skyndiútgáfu á vegabréfi og þá er tekið hærra verð (NOK 1.900) fyrir afgreiðsluna, þá er vegabréfið útbúið samdægurs á Íslandi og póstsent á heimilsfang umsækjanda. Venjulegur póstsendingartími milli Íslands og Noregs er frá tveimur til fimm daga.

Vegabréf fyrir 18 ára og yngri

Þegar sótt er um vegabréf fyrir barn yngra en 18 ára eiga báðir forsjármenn að mæta, ásamt barni, til þess að sækja um vegabréfð. Báðir forsjármenn þurfa að skrifa undir þar til gert skjal til að samþykkja útgáfu vegabréfsins. Ef annar forsjármaður barns getur ekki mætt skal hann rita samþykki sitt á skjalið sem þarf þá vottun tveggja einstaklinga yfir 18 ára. Einnig þarf að fylgja afrit af skilríkjum þar sem fram kemur mynd, kennitala og ríkisfang.

Fari aðili einn með forsjá barns er undirskrift hans nægjanleg vegna umsóknar um vegabréf og staðfestir Þjóðskrá Íslands að viðkomandi fari einn með forsjá. Sé viðkomandi búsettur erlendis þarf staðfestingu frá þjóðskrá í búsetulandi. Í Noregi er hægt að panta Bekreftelse på foreldreansvar frá Skatteetaten gegnum Altinn.

Barn sem fætt er erlendis og hefur ekki fengið útgefið vegabréf áður, þarf að hafa verið skráð sem íslenskur ríkisborgari í Þjóðskrá og fengið úthlutað kennitölu. Meðferðis þarf að hafa fæðingavottorð barnsins og upplýsingar um íslenska kennitölu.

Umsókn um íslenskan ríkisborgararétt fyrir barn fætt erlendis eftir 1. október 1998, sem á íslenskan föður, sem ekki var í hjúskap með móður við fæðingu barns, þarf að sækja um ríkisborgararétt hjá Útlendingastofnun.

Leyfilegt er að koma með mynd af umsækjanda á USB lykli, myndin þarf að vera tekin hjá ljósmyndara, ekki er leyfilegt að koma með mynd að heiman. Ekki er leyfilegt að átt hafi verið við myndina. Myndin verður að vera minnst 600x800 pixlar að stærð og með 300 dpi, andlitið verður vísa beint fram og þekja um 70-80% af breidd myndarinnar og myndin verður að vera yngri en 6 mánaða gömul. 

Nafnbreytingar

Ef umsækjandi hefur tekið upp nýtt eftirnafn eða breytt á einhvern hátt nafni sínu þarf að vera búið að ganga frá tilkynningu um slíkt til Þjóðskrár

Umsækjendum er bent á að sannreyna að nafn þeirra sé skráð í Þjóðskrá eins og óskað er að það komi fram í vegabréfi, sé ástæða til að ætla að um misræmi gæti verið að ræða.

 

Gjaldskrá sendiráðsins

18-66 ára:

Passa teg.   Verð
Vegabréf   970
Skyndiútgáfa   1.900
Neyðarvbr.   490
     

 

 

 

 

Aðrir:

Passa teg.   Verð
Vegabréf   440
Skyndiútgáfa   860
Neyðarvbr.   220
     

 

 

 

 

Upplýsingar um afhendingartíma vegabréfa má finna á heimasíðu Þjóðskrár Íslands.

 

 

Neyðarvegabréf

Neyðarvegabréf eru gefin út til að aðstoða íslenska ríkisborgara í neyð, helst til að komast heim eða á næstu umsóknarstöð vegabréfa. 

Neyðarvegabréf eru handskrifuð ferðaskilríki og er hámarksgildistími þeirra 12 mánuðir. Neyðarvegabréf eru ekki tölvulesanleg en gilda alltaf til heimferðar. Ferðamenn geta ekki gengið að því sem vísu að þeir geti stundað ferðalög með neyðarvegabréf því bæði flugfélög og stjórnvöld annarra ríkja geta neitað að taka neyðarvegabréf gild nema til heimferðar. 

 

Þarf vegabréf til að ferðast á milli Norðurlandanna

Ísland er aðili að Schengen samkomulaginu og norræna vegabréfaeftirlitssamningnum um afnám vegabréfaskoðunar við landamæri milli Norðurlandanna en kjarni beggja er m.a að tryggja frjálsa för einstaklinga um innri landamæri samstarfsríkjanna. Þess er hins vegar krafist að þeir sem þar ferðast hafi meðferðis gild persónuskilríki til að þeir geti sannað á sér deili. Þá geta flugfélög krafist þess að farþegar sýni vegabréf við innskráningu og einstök ríki geta hert reglur um vegabréfaeftirlit tímabundið. Því er ekki hægt að tryggja að ferðalangar komist á leiðarenda nema með gild vegabréf og er ferðalöngum eindregið ráðið frá því að treysta á önnur skilríki en vegabréf þegar farið er á milli landa. Ökuskírteini sýnir t.d ekki fram á íslenskt ríkisfang.

Íslenskir ríkisborgarar skulu ávallt hafa vegabréf meðferðis þegar ferðast er til og frá Íslandi þar sem vegabréf eru einu gildu íslensku ferðaskilríkin. Athugið að framlengd vegabréf teljast ekki lengur gild ferðaskilríki. (Heimild:  Utanríkisráðuneytið: Gátlisti fyrir ferðalög (kafli 3: Vegabréf) http://www.utanrikisraduneyti.is/borgarathjonusta/ferdalagid/ )

Athygli er vakin á því á að það getur tekið um mánuð eftir fæðingu barns að fá afgreitt fæðingavottorð frá norsku þjóðskránni.

Aðrar upplýsingar um vegabréf fyrir börn og/eða ferðalög innan Norðurlanda:

 

ATH þeir sem hyggjast ferðast utan EES verða að hafa vegabréf sem gilda í a.m.k 6 mánuði frá áætluðum ferðalokum. 

Þjónusta ræðismanna

Vakin er athygli á því að ræðismenn geta ekki lengur tekið við umsóknum um vegabréf.

Ræðismenn geta eftir sem áður haft milligöngu um útgáfu neyðarvegabréfa eftir því sem við á í sérstökum neyðartilfellum. 

 

Glatað vegabréf

Glatist vegabréf er mikilvægt að tilkynna það við fyrsta tækifæri, vinsamlega fyllið út tilheyrandi eyðublað sem má finna hér og sendið til sendiráðsins emb.oslo@mfa.is

 

Eyðublöð 

Aðrar upplýsingar varðandi vegabréf

Video Gallery

View more videos