Umsókn um íslensk vegabréf og ökuskírteini

Afgreiðsla umsókna hjá sendiráðinu

Sendiráð Íslands taka við umsóknum um vegabréf, sbr. það sem segir hér að neðan. Ekki er lengur hægt að skila inn umsókn um vegabréf til ræðismanna.

Hinn 6. september 2006 hófst útgáfa nýrrar gerðar íslenskra vegabréfa með sérstökum örgjörva og verða umsækjendur að koma í eigin persónu í sendiráðið þar sem lífkennamynd er tekin af viðkomandi á staðnum. Þar með er óþarfi að koma með passamynd.

Í samræmi við samþykktir Schengenríkja á vettvangi ESB var fingraförum bætt í örgjörva íslenskra vegabréfa frá og með 28. júní 2009. Börn yngi en 12 ára eru undanþegin fingrafaratöku.

Nýju vegabréfin eru svo til eins í útliti og þau sem verið hafa í notkun frá árinu 2006. Eldri vegabréf halda gildi sínu fram að næstu endurnýjun. Frekari upplýsingar er að finn á vefnum http://www.vegabref.is

Opnunartími sendiráðsins í Stokkhólmi er frá kl. 9-16 alla virka daga, en afgreiðslutími fyrir vegabréf er frá kl. 10-14 alla virka daga. Mælst er til þess að umsækjendur hafi í huga að frágangur umsóknar og myndataka getur tekið nokkra stund.

Vakin er athygli á því að ræðismenn geta ekki lengur tekið við umsóknum um vegabréf en geta eftir sem áður haft milligöngu um útgáfu neyðarvegabréfa og framlengingu vegabréfa, eftir því sem við á í sérstökum neyðartilfellum.

Gjald fyrir vegabréf er 414 SEK fyrir 18-66 ára en 156 SEK fyrir aðra. Við hraðafgreiðslu vegabréfa er gjaldið 818 SEK fyrir 18-66 ára en 308 SEK fyrir aðra (gjaldskrá þessi tók gildi 1. janúar 2013).  Hraðafgreiðsla tekur að venju minnst fimm virka daga. Venjuleg afgreiðsla tekur um þrjár vikur.
Sérstök athygli er vakin á því að ekki er hægt að taka við greiðslukorti, greiða verður fyrir með reiðufé.

Við vegabréfaumsóknir barna er þess krafist að báðir foreldrar eða forráðamenn komi í sendiráðið með barnið og veiti samþykki með undirskrift á fylgiskjali. Skjal það má finna hér.  Foreldrar eða forráðamenn þurfa að framvísa persónuskilríkjum.  Börn sem fædd eru erlendis verða að vera komin með kennitöluskráningu í íslensku þjóðskránni.  Framvísa þarf fæðingarvottorði barns (personbevis), hafi það ekki áður fengið útgefið íslenskt vegabréf.

ATH ! Nafnabreytingar !
Hafi umsækjandi tekið upp nýtt eftirnafn eða breytt  nafni sínu á einhvern hátt  þarf að vera búið að ganga frá tilkynningu um slíkt til þjóðskrár á Íslandi (http://www3.fmr.is/). T.d. gerist slíkt ekki sjálfkrafa þó makar taki upp nafn hvors annars við hjónavígslu í Svíþjóð.

Vegabréfin eru framleidd á Íslandi og póstsend til umsækjanda.

Þegar við á er einnig hægt að framlengja gildistíma vegabréfs um eitt ár frá þeim degi sem vegabréfið rann út. Hægt er að póstsenda vegabréfið til sendiráðsins ásamt greiðslu póstgjalds. Foreldrar eða forráðamenn þurfa að samþykkja framlenginu á vegabréfi barns með undirskrift á fylgiskjali. Skjal það má finna hér.  Sé vegabréfið sent með pósti þurfa tveir vottar að skrifa undir fylgiskjalið og ljósrit af persónuskilríkjum foreldra/forráðamanna þurfa einnig að fylgja með. Vegabréf er einungis hægt að framlengja einu sinni.

Í brýnustu neyð getur sendiráð gefið út neyðarvegabréf.  Neyðarvegabréf eru einungis gefin út gefist umsækjanda ekki tími til að sækja um venjulegt vegabréf með hraðafgreiðslu í sendiráðinu.  Tekið skal fram að neyðarvegabréf eru ekki ákjósanleg ferðaskilríki.

Hafi eldra vegabréf glatast þarf greinargerð, og mögulega lögreglusýrsla, þar að lútandi að fylgja umsókn.

Bent skal á að ekki er vegabréfakskylda fyrir norræna ríkisborgara þegar ferðast skal á milli Norðurlandanna, en þess er krafist að allir ferðist með gild skilríki með mynd. Þar sem börn hafa allra jafna ekki önnur skilríki en vegabréf er nauðsynlegt að forráðamenn barna sjái til þess að útvega vegabréf sem fyrst, hvert sem ferðinni er heitið.

Umsóknir um endurnýjun ökuskírteinis

Hægt er að sækja um endurnýjun á íslensku ökuskírteini í sendiráðinu í Stokkhólmi.

Umsókninni þarf að fylgja svokallað kennispjald sem útvega þarf frá Ríkislögreglustjóra. Best er að hringja fyrirfram, gefa upp nafn og íslenska kennitölu og biðja sendiráðið að útvega kennispjaldið. Fylla þarf út umsókn í sendiráðinu, koma með eina mynd og greiða í reiðufé SEK 298 fyrir 18-66 ára en SEK 83 fyrir 67 ára og eldri.

Afgreiðslutími ökuskírteinis er um fjórar vikur.

Íslensk ökuskírteini eru gild í Svíþjóð.