03.07.2014

Fermingarfræðsla í Svíþjóð - haust 2014

Fermingarfræðsla Íslensku kirkjunnar í Svíþjóð

Skráning í fermingarfræðslu fyrir næsta vetur stendur yfir.

Íslenska kirkjustarfið í Svíþjóð býður upp á fermingarfræðslu nú sem fyrr. Þátttakendur geta komið frá öllu landinu vegna þess að við hittumst tvisvar sinnum á fermingarmóti og þar fer mestur hluti kennslunnar fram.  Fermingarundirbúningurinn hefst með fermingarmóti á Åh Stiftgård helgina 26.-28. sept. 2014 Hópurinn hittist á brautarstöðinni í Gautaborg um hádegi á föstudegi.  Við förum með rútu til Åh stiftgård sem er 70 km fyrir norðan Gautaborg. Komum aftur til Gautaborgar um hádegi á sunnudegi og þaðan taka allir lest eða rútu heim.

Á fermingarmótinu gefst tækifæri til að kynnast og byrja fræðsluna af krafti. Á mótinu samtvinnum við nám, leik og skemmtilega samveru. Það koma einnig unglingar frá Noregi og Danmörku. Undanfarin ár höfum við verið með um 60 unglinga samtals og 15 fullorðna sem hafa umsjón með hópnum.

Fræðslan heldur áfram eftir fermingarmótið með því að unglingarnir sækja guðsþjónustur í heimabyggð og skila verkefnum með tölvupósti. Að vori hittist hópurinn að nýju á sama stað, helgina 8 – 10. maí 2015. Síðan er valfrjálst hvort fermingarathöfnin fari fram í Svíþjóð eða heima á Íslandi.

Þeir sem vilja vera með í fermingarfræðslu í vetur þurfa að skrá sig sem fyrst. Vinsamlega hafið samband á kirkjan@telia.com og þá fáið þið skráningarblað sent. Einnig er velkomið að leita frekari upplýsinga hjá undirrituðum í síma 0702863969.

Bestu kveðjur, Ágúst Einarsson, prestur Íslendinga í Svíþjóð

 

Nánari upplýsingar um fermingarfræðsluna og íslensku kirkjuna í Svíþjóð má finna hér.



Inspired by Iceland