27.04.2007

Utanríkisráðherrafundur Atlantshafsbandalagsins í Osló

Í dag lauk tveggja daga fundi utanríkisráðherra Atlantshafsbandalagsins í Osló, sem Valgerður Sverrisdóttir, utanríkisráðherra, sótti.

Á fundinum í gær ræddu ráðherrar aðgerðir bandalagsins í Afganistan og eldflaugavarnir í Evrópu. Utanríkisráðherra undirstrikaði mikilvægi þess að allir þeir sem komi að málum í Afganistan hafi með sér náið samráð og samstarf til að tryggja að árangur náist sem fyrst. Rætt var um þann mikla vanda sem ópíumframleiðsla er nú sem fyrr í Afganistan, en íslensk stjórnvöld hafa ákveðið að veita framlag í sjóð til styrktar baráttunni við eiturlyf í landinu. Framlagið nemur um 7 milljónum króna. Ráðherrar voru á einu máli um að efla þyrfti þjálfun hers og lögreglu. Íslensk stjórnvöld hafa í því samhengi ákveðið að veita framlag í sjóð sem Þróunarstofnun S.þ. (UNDP) hefur umsjón með (Law and Order Fund), sem meðal annars stendur straum að kostnaði við löggæslu í Afganistan. Framlagið nemur um 7 milljónum króna. Þá munu íslenskir lögreglumenn taka þátt í þjálfunaraðgerð Evrópusambandins, sem í undirbúningi er.


Í umræðum um fyrirhugað eldflaugavarnarkerfi Bandaríkjanna í Tékklandi og Póllandi lagði utanríkisráðherra áherslu á að náið samráð væri haft innan Atlantshafsbandalagsins um þróun málsins, og slíkt samráð yrði einnig að hafa við Rússland. Síðdegis í gær fór fram fundur í NATO-Rússlandsráðinu þar sem eldflaugavarnakerfið bar hæst í umræðum. Í ár eru fimm ár liðin frá stofnun NATO-Rússlandsráðsins og tíu ár frá því að komið var á fót sérstökum samstarfsvettvangi við Rússland innan Atlantshafsbandalagsins.

Utanríkisráðherrar Atlantshafsbandalagsins funduðu einnig um Balkanskaga og stækkun bandalagsins. Ráðherrafundinum lauk með sérstökum fundi með utanríkisráðherra Úkraínu. Utanríkisráðherra sagði mikilvægt að eiga samstarf við Úkraínu á vettvangi Atlantshafsbandalagsins en stjórnvöld þar í landi yrðu að ákveða hversu víðtækt og náið samstarfs af því tagi skuli vera.


Utanríkisráðherrar Atlantshafsbandalagsins og Evrópusambandsins áttu kvöldverðarfund í gær þar sem ástand og horfur fyrir botni Miðjarðarhafs voru rædd sem og málefni Kósóvó.



Inspired by Iceland