OECD, UNESCO og Evrópuráðið

Sendiráðið er fastanefnd Íslands gagnvart Efnahags- og framfarastofnun Evrópu (OECD), Menningarmálastofnun Sameinuðu þjóðanna (UNESCO) og Evrópuráðinu (Council of Europe). Hér að neðan eru frekari upplýsingar um þessar þrjár stofnanir.


 

OCDE/OECD

Efnahags- og framfarastofnunin

Ísland var meðal stofnríkja Efnahags- og framfarastofnunar Evrópu (OECD) árið 1961.

Markmið OECD er þríþætt:

  • Að ná sem mestum og varanlegustum hagvexti og sem hæstu atvinnustigi í aðildarríkjunum.
  • Að stuðla að almennri efnahagsþróun jafnt í aðildarríkjunum sem utan þeirra.
  • Að leggja sitt að mörkum til vaxtar og þróunar heimsviðskiptanna.

Þátttaka Íslands nær til um 200 ólíkra efnisþátta innan stofnunarinnar. Fastanefnd Íslands hjá OECD hefur einn starfsmann í fullu starfi við stofnunina en um 50 starfsmenn, þar af um helmingur frá fjármálaráðuneyti og Seðlabankanum, taka reglulega þátt í störfum stofnunarinnar, þar á meðal við greiningu á stöðu efnahagsmála á Íslandi. Meðal annarra efnisþátta sem Ísland tekur þátt í eru samskipti á sviði verslunar, fiskvinnslu, vísinda og tækni, stjórnsýslu, landbúnaðar, umhverfismála og samgangna. Frá árinu 2004 hefur Ísland beitt sér enn frekar í þróun samstarfsins við OECD. Sem dæmi má nefna útgáfu á „OECD Economic Survey ICELAND“ í apríl 2005.

www.oecd.org

Um Ísland: www.oecd.org/iceland


 

UNESCO

Menningarmálastofnun Sameinuðu þjóðanna

Menningarmálastofnun Sameinuðu þjóðanna, UNESCO, var komið á fót árið 1945, en Íslendingar gerðust aðilar árið 1964 og var Pétur Thorsteinsson fyrsti fastafulltrúi Íslands þar.

Árin 1983-87 átti Ísland fulltrúa í framkvæmdastjórn UNESCO, Andra Ísaksson, og átti á ný fulltrúa árin 2001-2005, Svein Einarsson. Frá árinu 1998 hefur Vigdís Finnbogadóttir, fyrrverandi forseti Íslands, verið velgjörðarsendiherra tungumála hjá stofnuninni og var um tveggja ára skeið formaður alþjóðaráðs um siðferði í vísindum og tækni (COMEST).

Hlutverk UNESCO er skilgreint í stofnskrá með þeim hætti, að stuðla beri að friði og öryggi með því að efla samvinnu þjóða í mennta-, vísinda- og menningarmálum og efla þannig almenna tiltrú og virðingu fyrir réttlæti, lögum og mannréttindum, án tillits til trúarbragða, kynþáttar, kynferðis eða tungumála, eins og tekið er fram í stofnskrá Sameinuðu þjóðanna sjálfra.

UNESCO er opið öllum aðildarríkjum S.þ. Markmiðum sínum hyggst UNESCO ná meðal annars með því að efla almannafræðslu og stuðla að því að allir eigi jafnan rétt til náms. Ennfremur með samvinnu þjóða um útbreiðslu þekkingar og skilnings manna á meðal og með því að aðstoða aðildarlönd við að byggja upp menntakerfi, sem henta á hverjum stað. UNESCO hefur einnig forystu um verndun menningararfleifðar heimsbyggðarinnar.

Ísland hefur samþykkt eftirtalda sáttmála UNESCO:

18.9.1956: Alþjóðasáttmála um höfundarrétt, Genf 6.9.1952
2.12.1977: Sáttmáli um alþjóðlega mikilvæg votlendi, Ramsar-sáttmálinn, Ramsar í Íran 2.2.1971
11.6.1986: Bókun vegna Ramsar-sáttmála, París 3.12.1982
18.6.1993: Bókun vegna Ramsar-sáttmála, Regina, Kanada, 28.5.1987
15.3.1994 Samningur um vernd listflytjenda, framleiðenda hljóðrita og útvarpsstofnana, Róm 26.10.1961
19.12.1995 Sáttmáli um verndun menningar- og náttúruarfleifðar heimsins, París 16.11.1972
9.2.2005 Sáttmáli um ólöglegan innflutning, útflutning eða aðra ólögmæta tilfærslu á eignarrétti menningarverðmæta, París 14.11.1970
5.10.2005 Sáttmáli um varðveislu menningarerfða, París 17.10.2003.


Undirritanir:

11.4.1997 Sáttmáli um viðurkenningu prófgráða í æðri menntun innan Evrópu, 11.4.1997
2.7.2004 Þingvellir settir á heimsminjaskrá

www.unesco.org

 

__________________________________________________________

Council of Europe

Ísland og Evrópuráðið

Evrópuráðið var stofnað 5. maí árið 1949 í kjölfar hörmunga síðari heimstyrjaldarinnar. Ísland gerðist aðili að ráðinu 7. mars 1950. Ísland hefur allt fá upphafi tekið virkan þátt í starfsemi Evrópuráðsins og Fastanefnd Íslands við Evrópuráðið var stofnuð í Strassborg 1997. Á tímabilinu 7. maí – 4. nóvember 1999 gegndi Ísland formennsku í ráðherranefnd Evrópuráðsins sem var kærkomið tækifæri til að árétta stuðning okkar við varðveislu mannréttinda og lýðræðisþróun í álfunni. Íslensk fagráðuneyti taka virkan þátt í samstarfi ríkja innan Evrópuráðsins og einnig ber að nefnda öfluga þátttöku íslenskra þingmanna í Íslandsdeild Evrópuráðsþingsins.


Vefsetur Evrópuráðsins

Laus störf hjá Evrópuráðinu

Council of Europe



Inspired by Iceland