Yfirlitssýning á verkum Errós í Madríd

Heimastjórn Madríd-borgar, í samvinnu við Nýlistastofnun Valenciu-héraðs, stendur þessa dagana fyrir yfirlitssýningu á 70 málverkum og 20 klippimyndum Errós. Sýningin var opnuð þann 5. apríl sl. að viðstöddum sendiherra Íslands á Spáni, Tómasi Inga Olrich. Menningarráðherra heimastjórnar Madríd-borgar, Santiago Fisas, hélt listamanninum og gestum hans myndarlegt hóf í tilefni opnunarinnar.

Um 70 manns voru við opnun sýningarinnar er ber heitið “Erró – El gran collage del Mundo” og er haldin í sýningarsal menningarráðuneyti Madríd-borgar, Alcalá 31, í hjarta höfuðborgarinnar. Að sögn sýningarstjórans, Victoriu Combalia, eru salirnir sérhannaðir utan um sýningu Erró, sem einkennist af mörgum mjög stórum verkum. Sýningin stendur til 21. maí.



Video Gallery

View more videos