Landkynning í tengslum við EM 2016

  • Íslandsstofa, í samstarfi við utanríkisráðuneytið, mennta- og menningarmálaráðuneytið, atvinnuvega- og nýsköpunarráðuneytið og sendiráð Íslands í Frakklandi skipuleggja landkynningarverkefni í tengslum við Evrópumeistaramótið í knattspyrnu karla sem haldið verður í Frakklandi dagana 10. júní til 10. júlí nk.

    Markmið verkefnisins er að nýta tækifærið sem gefst með EM til að kynna Ísland og allt sem íslenskt er í Frakklandi og verður m.a. efnt til margvíslegra list- og matarviðburða í París, Saint Étienne og Marseille þar sem íslenska landsliðið spilar fyrstu leiki sína í keppninni.

    Í Saint Étienne 13. júní verður bókmenntaviðburðurinn Rencontre Littéraire islandaise: í Librairie De Paris, 68 rue Michel Rondet. Steinunn Sigurðardóttir og Hallgrímur Helgason ásamt Valérie Landry og Alexandra Charroin Spangenberg ræða um íslenskar bókmenntir. Teitur Magnússon tónlistarmaður mun leika nokkur lög eftir umræðurnar. Mennta- og menningarmálaráðherra Íslands hr. Illugi Gunnarsson mun opna viðburðinn. Umræður hefjast kl. 17.30.

    Illugi Gunnarsson opnar síðan Menningarhátíðina Air d‘Islande 17. júní í La Criée leikhúsinu í Marseille þar sem íslenska fjallkonan stígur á stokk í tilefni þjóðhátíðardagsins. Barði Jóhannsson flytur frumsamda tónlist við kvikmyndina HAXAN sem er meistaraverk frá tímabili þöglu myndanna og fjallar um nornir og galdra.

    Þann 18. júní verður Air d'Islande í Make It Marseille Galleríinu frá kl. 11.00 – 19.00. Sýnd verða vídeóverk og kvikmyndir eftir franskt og sænskt listafólk sem eiga það sameiginlegt að hafa unnið verkin á Íslandi. Verkin hafa orðið til í samstarfi við Centre Pompidou safnið í París, SÍM á Íslandi, Swedish Arts Council, Skaftfell residency á Seyðisfirði, Nordiska konstnärsförbundet og Alþjóðlegu kvikmyndahátíðina í Reykjavík. Öll varpa verkin áhugaverðu ljósi á Ísland og gefa áhorfendum mynd af upplifun listafólksins þar. Listamaðurinn Curver kemur fram og verður með „eigið herbergi“ í rýminu. Snæbjörn Brynjarson og Ragnheiður Sigurðardóttir Bjarnarson verða einnig með „eigið herbergi" í rýminu og koma til með að vera með innsetningu og vídeólist, ásamt gjörningi.

    Evróputorg í París

     17. júni verða þjóðarhátíðartónleikar með President Bongo og ADHD á La Machine du Moulin Rouge. Tónleikarnir byrja kl. 20.

  • Í París verður íslenskt hús á ráðhústorginu frá 18. júní allt þar til keppnin er yfirstaðin en fyrir utan almenna landkynningu þar verður efnt til ýmissa viðburða til að kynna íslenska menningu og mat.

    • 20. júní verður tónlistar og matarviðburður á Evróputorginu í París frá kl. 18:00 bæði á íslenska svæðinu en einnig í hvelfingu sem verður sett upp á torgin. Matvælasvið Íslandsstofu sér um matarsmakk með Viktori Erni Andréssyni matreiðslumeistara og keppanda í Bocuse d‘Or keppninni.
    • 20.-23. júní verður tónlist við hús Íslands þar sem Margrét Arnardóttir og Birkir Blær munu spila íslensk dægurlög á harmónikku og saxófón.
    • 25. júní verður sett á laggirnar prjónavinnustofa þar sem íslensk prjónahefð og ull verður höfð í forgrunni.
    •  8.-10. júlí mun Snorri Helgason sjá um tónlist við íslenska húsið. 

 

Video Gallery

View more videos