Konsert í Norðurlandahúsinum

Tað er íslendski rock-bólkurin Dúndurfréttir, sum saman við fimm føroyskum kvinnuligum artistum, fer at standa fyri tónlistarligu framførsluni av hesi megnar útgávuni hjá Pink Floyd leygarkvøldið 5. mars.

Plátan “The Dark Side of the Moon” kom á marknaðin í mars 1973 og var tá hin áttanda í pláturøðini hjá enska progressiva rock-bólinum Pink Floyd. Útgávan er ein sokallað konsept-fløga, sum byggir á tær royndir, ið bólkurin fekk á konsertferðum og live-framførslum árini frammanundan. Syd Barrett, sum stovnaði bólkin og var tann kreativa orkan handan flestu løgini og tekstirnar, fór úr bólkinum í 1968 og gjørdist altsamt meira sálarliga viðbrekin og sjúkur. Júst trupla støðan hjá vinmanninum hevur eisini givið íblástur til bæði tónleikin og tekstin á útgávuni, har sálarsjúka er eitt høvuðstema saman við m.ø. stríð, makt - og pengagirnd.

“The Dark Side of the Moon” útgávan fekk sera góða móttøku og reyk beint á Billboard 200 listan og varð verandi á listanum tær næstu 741 vikurnar á rað, frá 1973 til 1988, og hetta er tað longsta nøkur útgáva í tónleikasøguni hevur ligið á billboard listanum. Mett verður, at 45 milliónir eintøk eru seld av útgávuni, og er hon sostatt ein hin mest selda útgávan í heiminum nakrantíð. Tvey tey kendastu støku løgini úr útgávuni munnu verða “Money” og “Us and Them”, og “The Dark Side of the Moon” sigst verða yndisútgávan hjá bæði Pink Floyd fjepparum og ummælarum. Útgávan er júst í nú í januar 2011 komin aftur á listan hjá U.S. Billboard Hot 100 og hevur í skrivandi stund verið á listanum í 773 vikur tilsamans.

Nú fáa vit so høvi at hoyra henda framúr góða tónleikin í Norðurlandahúsinum leygarkvøldið 5. mars kl. 19.00, tá ið íslendski bólkurin Dúndurfréttir trýnir á pallin. Sami bólkur var í Norðurlandahúsinum í februar 2009 og framførdi The Wall saman við Føroya Symfoniorkestri fyri trimum fullsettum hølum. Nógv rósandi orð vóru at hoyra frá áhoyrarunum eftir stórslidnu konsertirnar. Til framførsluna av “The Dark Side of the Moon” verður ikki nakað symfoniorkestur við, men føroyska luttøkan er tó ikki minni stórbær hesuferð; fimm av okkara dugnaligastu kvinnuligu artistum trýna á pallin saman við Dúndurfréttir. Eitt av kendu løgunum á útgávuni er “The Great Gig in the Sky”, sum á útgávuni verður sungið av Abbey Road Studio sangarinnuni Clare Torry. Hetta lagið fer føroyski X-factor luttakarin Anna Faroe at framføra saman við bólkinum. Eisini verður Konni Kass við á saxofon og tær tríggjar bakgrundsrøddirnar eiga Unn Paturson, Eyð Berghamar Jacobsen og Anna Maria Olsen.

Atgongumerkjasølan er farin ígongd og til ber at keypa atgongumerkir á kr. 250 á Kunningarstovunum kring landið, í Norðurlandahúsinum og á www.nlh.fo