13.09.2010

Menntamálaráðherra í heimsókn

Katrín Jakobsdóttir samstarfsráðherra sat fund samstarfsráðherra Norðurlanda í Þórshöfn á Færeyjum, þriðjudaginn 7. september.

Á fundinum fór fram lokaumræða samstarfsráðherranna um tillögu að fjárhagsáætlun fyrir Norrænu ráðherranefndina 2011. Samkvæmt tillögunni yrði fjárhagsáætlun næsta árs 896,355 milljónir danskra króna og koma framlög til hennar beint frá norrænu ríkjunum.

Einnig fór fram umræða um aðgerðir til þess að ryðja úr vegi stjórnsýsluhindrunum á Norðurlöndum, en vonir eru bundnar við að aukið lagasamstarf og lagasamræming innan landanna geti komið í veg fyrir að nýjar hindranir verði til. Meðal þess sem nú er til skoðunar hjá nefnd á vegum ráðherranefndarinnar er gjaldtaka bankanna við millifærslur milli landanna, notkun kennitalna í netviðskiptum og sérstakt færslugjald á erlend kreditkort sem tíðkast í Danmörku.

Á fundinum varð einnig rætt málefni norræna erfðalindabankans NordGen sem stofnaður var í byrjun árs 2008. NordGen fæst við rannsóknir á sjálfbærri notkun erfðalinda á Norðurlöndum en þær skipta miklu fyrir fæðuöryggi í framtíðinni. Rætt var um framtíð þessa mikilvæga samstarfs og hvernig megi renna traustari stoðum undir það.

Fyrirhugað þing Norðurlandaráðs sem að þessu sinni verður haldið í Reykjavík var einnig á dagskrá fundarins. Danir fara með formennsku í Norrænu ráðherranefndinni í ár, en á þinginu munu Finnar kynna formennskuáætlun sína sem kemur til framkvæmda 1. janúar 2011.





Inspired by Iceland