14.09.2010

Forsætisráðherra í opinberri heimsókn

Jóhanna Sigurðardóttir forsætisráðherra var í opinberri heimsókn í Færeyjum 6.-8. sept. Meðan á heimsókninni stóð átti forsætisráðherra fund með Kaj Leo Johannessen, lögmanni Færeyja, en hann sótti Ísland heim í október síðastliðnum.

Jóhanna Sigurðardóttir forsætisráðherra og Kaj Leo Johannessen, lögmaður Færeyja, funduðu 8. sept og undirrituðu við það tækifæri viljayfirlýsingu um aukið samstarf forsætisráðuneytanna. Samstarfið tekur einkum til jafnréttismála og verkefna varðandi breytingar og þróun í stjórnsýslunni og ráðuneytum.

Ráðherrar færeysku ríkisstjórnarinnar áttu jafnframt fund með forsætisráðherra og kynnti forsætisráðherra þeim m.a. stöðu efnahagsmála, jafnréttismál og fyrirhugað stjórnlagaþing. Forsætisráðherra og lögmaður ræddu ennfremur aukið samstarf landanna á sviði jafnréttismála, aðildarumsókn Íslands að Evrópusambandinu, tvíhliða samstarf og fyrirhugaðar breytingar á stjórnarráði Íslands.

Forsætisráðherra og lögmaður heimsóttu Norðurlandahúsið, Listasafn Færeyja og Þjóðminjasafn Færeyja. Lögmaður hélt forsætisráðherra kvöldverð í Kirkjubæ, sem hefur mikið menningarsögulegt gildi í Færeyjum.

Heimsóknin til Færeyja var fyrsta opinbera heimsókn forsætisráðherra frá því að hún tók við embætti. Á blaðamannafundi sem haldinn var þakkaði forsætisráðherra færeyska lögmanninum sérstaklega vel fyrir móttökurnar og lagði áherslu á það góða og trausta samband sem hefði verið og yrði áfram á milli þjóðanna.

Viljayfirlýsing Færeyja og Íslands





Inspired by Iceland