Þjónusta við Íslendinga

Vegabréfaútgáfa

Sendiráð Íslands í Helsinki tekur ekki lengur við umsóknum um íslensk vegabréf. Möguleikar sem eru fyrir hendi:

1. Nýtt vegabréf

Hægt er að sækja um nýtt vegabréf í sendiráðum Íslands í Kaupmannahöfn, Stokkhólmi, Osló, Berlín, Lundúnum og Washington. Nánari upplýsingar um umsóknarferlið er að finna á www.skra.is > Þjóðskrá > Vegabréf.

Stokkhólmur: Afgreiðslutími er á opnunartíma sendiráðsins; 9-16 alla virka daga. Mælt er með því að umsækjendur hafi í huga að frágangur umsóknar og myndataka geti tekið nokkra stund og er þess vegna æskilegt, ef því verður við komið, að koma fyrir kl. 15. Vakin er athygli á því að ræðismenn geta ekki lengur tekið við umsóknum um vegabréf. Umsækjendur verða að koma í eigin persónu til sendiráðsins þar sem lífkennamynd er tekin af viðkomandi á staðnum. Þar með er óþarfi að koma með passamynd. Hraðafgreiðsla tekur að venju minnst 2 virka daga.

Þegar sótt er um vegabréf fyrir barn undir 18 ára aldri skulu báðir foreldrar eða forráðamenn undirrita þar til gert eyðublað. Börn sem fædd eru erlendis þurfa að vera komin með kennitöluskráningu í íslensku þjóðskránni.

Vegabréfin eru útbúin á Íslandi og póstsend til umsækjanda.

2. Framlenging vegabréfs

Sendiráðið í Helsinki getur framlengt vegabréf sem nýlega hefur runnið út, þó ekki lengur en svo að upprunalegur gildistími þess framlengist um eitt ár. Einungis er hægt að framlengja vegabréf einu sinni. Framlenging kostar ekkert.

3. Neyðarvegabréf

Sendiráðið í Helsinki getur gefið út neyðarvegabréf. En hafa ber hugfast að neyðarvegabréf eru ekki ákjósanlegustu ferðaskilríki sem völ er á og duga engan veginn sem fullgild skilríki til langdvalar erlendis.

4. Verðskrá vegabréfa

18-66 ára:
Almennt vegabréf: 50 EUR
Skyndiútgáfa almenns vegabréfs: 99 EUR
Neyðarvegabréf: 25 EUR

Aðrir (börn, lífeyrisþegar, námsmenn):
Almennt vegabréf: 19 EUR
Skyndiútgáfa almenns vegabréfs: 37 EUR
Neyðarvegabréf: 9 EUR

5. Ferðalög til Bandaríkjanna

Öll gild íslensk vegabréf sem gefin eru út eftir 1. júní 1999 munu gilda áfram til þess að ferðast án áritunar til USA. Þeir sem bera íslensk vegabréf útgefin fyrir 1. júní 1999 og ætla til USA þurfa nú þegar annað hvort að sækja um áritun til USA í bandarísku sendiráði eða sækja um nýtt vegabréf. Athugið að þetta tengist ekki útgáfu nýrra íslenskra vegabréfa.

6. Vegabréfsáritanir

Íslendingar þurfa í sumum tilvikum vegabréfsáritanir til að geta ferðast til annarra ríkja. Frekari upplýsingar er að finna á vef utanríkisráðuneytisins.

Skráning barna í íslensku þjóðskrána

Mögulegt er að láta skrá börn sem fædd og búsett eru í Finnlandi en eru með íslenskan ríkisborgararétt í Þjóðskrá á Íslandi (www.skra.is > Þjóðskrá > Þjónusta > Skráning í þjóðskrá) og fá þau þá úthlutað íslenskri kennitölu. Gefa þarf upp fullt nafn barns og fæðingardag. Beiðninni þarf einnig að fylgja virkatodistus/ämbetsbevis frá finnska maistraatti/magistrat eða finnsku kirkjunni. Hægt er að hafa samband beint við þjóðskrá en sendiráðið kemur gögnunum til skila sé þess óskað.

Skráning í þjóðskrá í Finnlandi

Við flutning til Finnlands þarf ekki lengur að fylla út samnorrænt flutningsvottorð á Íslandi. Það sem þarf að gera er að fara til finnska maistraatit/magistraterna á þeim stað sem viðkomandi mun búa á og tilkynna um flutning þar. Þeir sjá svo um að tilkynna Þjóðskrá á Íslandi um flutninginn. Flutningarnir gerast með öðrum orðum rafrænt sem á að stytta allan skráningartímann.

Íslendingafélag

Í Finnlandi er starfandi Félag Íslendinga í Finnlandi og skipuleggur félagið m.a. jólafagnað, þorrablót og skólabúðir fyrir íslensk börn en félagið stendur fyrir íslenskuskóla í samstarfi við menntamálaráðuneytið og Norrænu stofnunina í Finnlandi.

Íslenski skólinn í Finnlandi  

Í Helsinki og Espoo er starfræktur íslenskuskóli fyrir börn á skólaaldri. Kennslan fer fram einu sinni í viku í einn og hálfan tíma í senn. Námsefni miðast við aðalnámskrá menntamálaráðuneytisins fyrir íslenska grunnskóla og er lögð áhersla á málfræði, stafsetningu, sögu Íslands, lesskilning o.fl.

Á vorin eru einnig haldnar skólabúðir með íslensku ívafi.

Nánari upplýsingar veitir Arna Lísbet Þorgeirsdóttir í síma 050-307 5096. Hún tekur einnig á móti skráningum í skólann. 

Íslenskuskólinn

Íslenskuskólinn er skóli á netinu fyrir íslensk börn og foreldra þeirra sem eru búsett erlendis. Í skólanum er áhersla lögð á íslenskukennslu, en aðrar námsgreinar fléttast að einnig inn í námið.

Skráning í skólann er ókeypis og þar kynnast nemendur öðrum krökkum á sama aldri sem jafnvel búa á sömu slóðum. Í skólanum er líka opinn verkefnabanki þar sem nemendur frá sex ára aldri finna skemmtileg verkefni við hæfi, sem reyna á lestur, ritun og hlustun.

Námsmenn

Samband íslenskra námsmanna erlendis (SINE) veitir allar nánari upplýsingar.