29.09.2006

Ný íslensk vegabréf

Frá og með mánudeginum 2. október verður hægt að sækja um ný íslensk vegabréf hjá sendiráðinu.

Opnunartími sendiráðsins er 9-16 alla virka daga, en afgreiðslutími fyrir vegabréf er frá 10-14 alla virka daga, samkvæmt tímapöntun með a.m.k. dags fyrirvara. Umsækjendur þurfa að hafa í huga að frágangur umsóknar og myndataka getur tekið nokkra stund.

Vakin er athygli á því að ræðismenn geta ekki lengur tekið við umsóknum um vegabréf.

Ræðismenn geta eftir sem áður haft milligöngu um útgáfu neyðarvegabréfa, ferðaskilríkja og framlengingu vegabréfa eftir því sem við á í sérstökum neyðartilfellum.

Umsækjendur verða að koma í eigin persónu til sendiráðsins þar sem lífkennamynd er tekin af viðkomandi á staðnum og er þar með óþarfi að koma með passamynd. Gjald er það sama og áður, DKK 510 fyrir 18-66 ára en DKK 190 fyrir aðra sem óskast greitt í reiðufé. Ekki er tekið við greiðslukortum.

Við vegabréfaumsóknir barna er þess krafist að báðir foreldrar eða forráðamenn komi í sendiráðið og samþykki með undirskrift á fylgiskjali. Fylgiskjal þetta er hægt að nálgast á www.vegabref.is og einnig er hægt að fá það sent frá sendiráðinu geti annað foreldri/forráðamaður af einhverjum ástæðum ekki mætt í sendiráðið en þá þarf hann/hún að hafa undirritað skjalið og fengið það vottað af tveimur einstaklingum og þarf ljósrit af persónuskilríkjum forræðismanns og beggja votta að fylgja með. Sé um einn forræðisaðila að ræða er æskilegt að framvísa sönnunargagni þar um, skilnaðarpappírum eða staðfestum samningi um forsjá.

Börn sem fædd eru erlendis þurfa að vera komin með kennitöluskráningu í íslensku þjóðskránni og nauðsynlegt er að kennitöluvottorð frá þjóðskrá fylgi komi kennitala ekki fram á skírnarvottorði barnsins, sem einnig þarf að framvísa, eða fæðingarvottorði, hafi barnið ekki fengið útgefið vegabréf fyrr.

ATH!! Nafnabreytingar!

Ef umsækjendi hefur tekið upp nýtt eftirnafn eða breytt á einhvern hátt eftirnafni sínu þarf að vera búið að ganga frá tilkynningu um slíkt til þjóðskrár á Íslandi (www.thjodskra.is). Slíkt gerist ekki sjálfkrafa þó makar taki upp nafn hvors annars við hjónavígslu í Danmörku.

Vegabréfin eru síðan útbúin á Íslandi og póstsend til umsækjanda innan fárra daga.





Inspired by Iceland