06.02.2013

Trúnaðarbréf afhent í Kambódíu

Kristín A. Árnadóttir sendiherra afhenti Heng Samrin, forseta þjóðþings Kambódíu, trúnaðarbréf sitt sem sendiherra Íslands gagnvart Kambódíu með aðsetur í Peking þann 28. janúar s.l. í Phnom Penh. Heng Samrin er enn fremur aðalráðgjafi konungs Kambódíu, Norodom Sihamoni.  Þjóðarsorg hefur ríkt í Kambódíu síðan fyrrverandi konungur landsins, Norodom Sihanouk, lést í október á síðasta ári. Bálför hans fór fram þann 1. febrúar sl. Sendiherra Íslands kom á framfæri  vilja íslenskra stjórnvalda til að treysta samvinnu og samskipti ríkjanna. Áhugi Íslendinga á Kambódíu hefur aukist mikið á undanförnum árum sem ekki síst kemur fram í vaxandi fjölda ferðamanna frá Íslandi til Kambódíu. Heng Samrin þingforseti kvað Ísland í hugum Kambódíumanna vera ríki lýðræðis og friðar. Yfirvöld í Kambódíu bindi vonir við aukin viðskiptatengsl og samvinnu um gagnkvæm hagsmunamál. Auk þingforsetans sátu fundinn utanríkisráðherra landsins og fleiri.

 

 

 



Inspired by Iceland