08.07.2014

Samantekt frétta af heimsókn ráðherra til Kína í júní og júlí 2014

Hér að neðan má sjá samantekt frétta af heimasíðu utanríkisráðuneytisins um heimsókn utanríkisráðherra til Kína nýverið:

26. júní 2014:  Utanríkisráðherra fundar um viðskiptamál í Kína

Gunnar Bragi Sveinsson, utanríkisráðherra, er þessa dagana í heimsókn í Kína ásamt viðskiptasendinefnd. Fundar hann þar með ráðamönnum og kynnir sér starfsemi íslenskra fyrirtækja í Kína og hvernig megi auka og víkka út viðskipti og samstarf Íslands og Kína á næstu árum.

Fyrr í dag átti utanríkisráðherra fund í Peking með viðskiptaráðherra Kína, Gao Hucheng, í tilefni af gildistöku fríverslunarsamnings Íslands og Kína 1. júlí nk. Ræddu ráðherrarnir vaxandi viðskipti ríkjanna og þau tímamót í samskiptum ríkjanna sem fríverslunarsamningurinn markar. Vonir standa til að samningurinn auki verulega viðskipti ríkjanna. Efnahagslegt samstarf af ýmsum toga var rætt, ekki síst þróun samstarfs í orkumálum, m.a. jarðvarma. Þá ræddu ráðherrarnir ferðamál, samvinnu á Drekasvæðinu og áhuga íslenskra fyrirtækja á sölu á ýmsum kjötafurðum og mjólkurvörum til Kína.Þá fundaði utanríkisráðherra með varautanríkisráðherra Kína, Wang Chao. 

Fögnuðu ráðherrarnir þeim tækifærum sem fælust í fríverslun milli ríkjanna, auknu samstarfi á ýmsum sviðum og því samráði sem hér væri hafið samkvæmt viljayfirlýsingu forsætisráðherra ríkjanna frá fyrra ári. Í því samhengi minntust þeir nýgerðs samkomulags um samráð á sviði vinnumála.  Norðurslóðamál bar hátt á fundinum, áherslur Íslands á því sviði og samstarfsmöguleikar m.a. á sviði umhverfisverndar. Evrópumál og efnahagsmál bar einnig á góma, sem og mikilvægi jafnréttismála.

Á morgun fundar Gunnar Bragi Sveinsson með utanríkisráðherra Kína, Wang Yi. Þá ávarpar hann viðskiptaþing íslenskra og kínverskra fyrirtækja en á þinginu er lögð áhersla á matvælaútflutning þ.m.t. sjávarafurðir. Ráðherra mun ennfremur funda með forstjóra Sinopec Group, sem er í samstarfi við Orka Energy um hitaveituverkefni í Kína.

27. júní 2014: Utanríkisráðherrar Íslands og Kína funda í Peking

Gunnar Bragi Sveinsson, utanríkisráðherra, átti í dag fund með utanríkisráðherra Kína, Wang Yi, var þetta fyrsti  formlegi fundur milli utanríkisráðherra Kína og Íslands eftir að leiðtogaskipti urðu í Kína í fyrra.


Ráðherrarnir ræddu samskipti ríkjanna almennt og sérstaklega um þann merka áfanga sem gildistaka fríverslunarsamnings ríkjanna væri.  Ráðherrarnir sammæltust um að auka samráð og samstarf í málefnum norðurslóða, nýtingu auðlinda í sátt og samlyndi við náttúruna og þau tækifæri sem mögulega væru að opnast vegna nýrra siglingaleiða. Þá ræddu þeir ástand mála víðs vegar um heiminn, ekki síst þær viðsjár sem nú væru í Írak, Úkraínu og víðar.  


Sagði kínverski utanríkisráðherrann samband Íslands og Kína einstakt. Viðskipti ríkjanna hefðu aukist þrátt fyrir efnahagslega lægð síðustu ára. Þá sagði hann frekari möguleika og tækifæri fyrir vöxt þegar fríverslunarsamningur milli landanna tekur gildi á þriðjudag, 1. júlí.

Síðdegis ávarpaði ráðherra viðskiptaþing íslenskra og kínverskra fyrirtækja, sem Íslandsstofa í samvinnu við CAWA (Samtök kínverskra heildsölumarkaða fyrir matvæli) stóð fyrir. Sagði ráðherrann mikilvægt að skoða hvernig auka mætti útflutning til Kína á íslenskum afurðum og yrði heimsókn viðskiptasendinefndar og þingið með kínverskum fyrirtækjum vonandi til þess að svo yrði.  Efnahagur Kína er næst stærstur í heimi með vaxandi millistétt sem talið er að telji fleiri en samanlagður fólksfjöldi Bandaríkjanna. “Þessi staðreynd hefur og mun hafa áhrif á neyslu og viðskipti í heiminum og í því felast tækifæri fyrir Ísland”, sagði Gunnar Bragi Sveinsson við þetta tækifæri.

Þá átti utanríkisráðherra fund með varaforseta Sinopec samsteypunnar, Cao Yaofeng. Samstarfsverkefni á sviði jarðvarma og vaxandi vægi jarðvarma í orkubúskap Kína voru til umræðu á fundinum. 

Í lok dags fundaði ráðherra með fulltrúum íslenskra fyrirtækja og viðskiptasendinefnd í nýju húsnæði sendiráðsins.  

Á morgun fer ráðherra til Qingdao og kynnir sér starfssemi Eimskipa og fundar með ráðamönnum.

1. júlí 2014: Utanríkisráðherra í Sjanghæ

Í dag lauk heimsókn Gunnars Braga Sveinssonar utanríkisráðherra til Sjanghæ, þar sem hann kynnti sér starfssemi íslenskra fyrirtækja. Af því tilefni var undirritaður samstarfssamningur Ramma hf (IS Seafood) og kínverskra matvælafyrirtækja, Shenzen Agricultural Product limited og Beijing Er Shany Group, um innkaup á hágæða íslensku sjávarfangi, markaðssetningu og þjálfun í meðhöndlun afurðanna. Hugmyndin að samstarfi fyrirtækjanna kviknaði á nýlegu viðskiptaþingi í Peking, sem skipulagt var í tengslum við heimsókn ráðherra.

Utanríkisráðherra átti fund með varaborgarstjóra Sjanghæ, Tu Guangshao, en borgin er sú stærsta í Kína, með um 24 milljónir íbúa,og er viðskiptahöfuðborg Kína. Fer þeim íslensku fyrirtækjum fjölgandi sem horfa til starfsemi í borginni.

Þá heimsótti Gunnar Bragi kínversku Heimskautastofnunina og fundaði með dr. Huigen Yang, forstjóra hennar. Fékk ráðherra tækifæri til að fræðast um starfsemina a frá fyrstu hendi þegar hann ræddi gegnum fjarfundarbúnað við nokkra kínverska vísindamenn, sem staddir eru á Suðurpólnum við rannsóknir.



Inspired by Iceland