Öryggis- og samvinnustofnun Evrópu (ÖSE/OSCE)
ÖSE gegnir mikilvægu hlutverki við eflingu öryggis, mannréttinda, lýðræðis og átakavarna í aðildarríkjunum sem eru fimmtíu og sjö talsins eftir nýlega aðild Mongólíu. Innan stofnunarinnar sem staðsett er í Vín fer fram reglubundið samráð á sviði mannréttindamála, lýðræðis, réttinda minnihlutahópa, auk öryggis- og afvopnunarmála. Einnig má nefna víðtækt kosningaeftirlit á vegum stofnunarinnar í aðildarríkjunum. Öll ríki Evrópu eiga aðild að ÖSE auk Bandaríkjanna, Kanada, Kasakstan, Kirgisíu, Mongólíu, Tadsjikistan, Túrkmenistan og Úsbekistan.
Með framlagi stofnunarinnar á ofangreindum sviðum, ekki síst með starfi sautján sendinefnda ÖSE á vettvangi (OSCE field operations) í aðildarríkjunum, gegnir ÖSE þýðingarmiklu hlutverki við að tryggja stöðugleika og festa lýðræði í sessi. Ísland hefur á vettvangi ÖSE lagt sérstaka áherslu á vernd mannréttinda og baráttuna gegn mansali auk baráttu stofnunarinnar gegn hryðjuverkum.
Stefán Skjaldarson, sendiherra, afhenti þann 16. október 2009 Marc Perrin de Brichambaut, þáverandi framkvæmdastjóra Öryggis- og samvinnustofnunar Evrópu (ÖSE) í Vínarborg, trúnaðarbréf sitt sem fastafulltrúi Íslands hjá Öryggis- og samvinnustofnun Evrópu.
