18.02.2014

Ráðstefna IAEA um geislavarnir eftir Fukushima haldin í Vín, 17.-21. febrúar 2014.

 

 

 

 

 

Mr. Sigurður M. Magnússon, Chairperson, Icelandic Radiation Safety Authority

Photo Credit: Dean Calma / IAEA

 

Ráðstefna Alþjóðakjarnorkumálastofnunarinnar (IAEA) um geislavarnir eftir kjarnorkuslysið í Fukushima hófst í höfuðstöðvum stofnunarinnar í Vínarborg í gær og stendur til föstudags. Ráðstefnuna sækja um 300 sérfræðingar frá um 75 löndum og 12 alþjóðastofnunum. Sigurður M. Magnússon forstjóri Geislavarna ríkisins er forseti ráðstefnunnar.

Tilgangur ráðstefnunnar er einkum að fjalla um reynslu og lærdóm sem draga má af kjarnorkuslysinu í Fukushima, bæði hvað varðar grunnskipulag geislavarna og framkvæmd þeirra á heimsvísu sem og í einstökum löndum. Á ráðstefnunni verður m.a. fjallað um dreifingu geislavirka efna sem bárust í umhverfið og þá geislun sem fólk varð fyrir frá þeim. Einnig verður fjallað um ýmsa læknisfræðilega og þjóðfélagslega þætti, og aðgerðir til að draga úr afleiðingum slyssins til lengri tíma. Sérstök áhersla verður lögð á ýmsa þætti sem taka þarf tillit til við aðkomu íbúa að brýnum úrlausnarefnum eftir kjarnorkuslys, m.a. hreinsun lands og nýtingu þess eftir hreinsun sem og hvenær fólk snýr aftur til landsvæða sem voru rýmd. Gert er ráð fyrir að niðurstöður ráðstefnunnar hafi áhrif á starf IAEA í framtíðinni.

Ráðstefnan er liður í framkvæmdaáætlun IAEA um kjarnöryggi (IAEA’s Action Plan on Nuclear Safety) sem gerð var í kjölfar slyssins í Fukushima árið 2011. Áætlunin, sem miðar að því að bæta kjarnöryggi í heiminum, var samþykkt á ársfundi IAEA í september 2011. Í þeim tilgangi efnir stofnunin m.a. til ráðstefna þar sem sérfræðingar aðildarríkja hennar greina orsakir og afleiðingar kjarnorkuslyssins í Fukushima með áherslu á hvaða lærdóm megi draga af því. Einnig er þar fjallað um hvernig bæta megi viðbrögð við kjarnorkuslysum og hvernig best megi draga úr langtímaáhrifum þeirra.

Meira um IAEA og ráðstefnuna hér http://iaea.org/



Inspired by Iceland